រឿង ខ្មោចឆ្កួតតណ្ហា
កាលពីឆ្នាំ ១៩៩៣ ពេលនោះនាងខ្ញុំបានធ្វើការនៅក្រុមហ៊ុនមួយជារបស់បារាំង ។ នាងខ្ញុំជាបុគ្គលិកបំរើការនៅក្នុងការិយាល័យ ។ ផ្ទះដែលជាទីស្នាក់ការកណ្ដាលរបស់ក្រុមហ៊ុននោះ ជាផ្ទះឈើពីរខ្នងមានបវិវេណធំទូលាយព្រមទាំងមានដើមឈើនៅជុំវិញផ្ទះ គួរឲ្យចង់រស់នៅ ។ នៅជាន់ក្រោម គេបានរៀបចំធ្វើជាការិយាល័យការងារ ចំណែកជាន់លើធ្វើជាកន្លែងសម្រាក ។ មានបន្ទប់ទាំងអស់ចំនួន ៤ បន្ទប់ធំជាងគេជារបស់លោកអនុប្រធាន ។ ដោយសារនៅមានបន្ទប់ទំនេរនៅឡើយលោកអនុប្រធានក៏អនុញ្ញាតឲ្យនាងខ្ញុំសម្រាកនៅកន្លែងធ្វើការដែរ ព្រោះយល់ថាផ្ទះរបស់នាងខ្ញុំនៅឆ្ងាយជាងគេ ។
រាល់ថ្ងៃសម្រាក ផ្ទះនេះតែងតែស្ងាត់ព្រោះនៅចាំកន្លែងតែនាងខ្ញុំ និងចុងភៅពីរនាក់ទៀតតែប៉ុណ្ណោះ ។ បន្ទប់សល់ពីរទៀតនៅជាប់គ្នា ហើយនៅចំពីរមុខទ្វាររបងផ្ទះផង ។ ធ្លាប់បានឮ ចាស់ៗនិយាយថា មិនល្អទេព្រោះផ្លូវចេញចូលនោះ ជាផ្លូវខ្មោចឆ្លងកាត់ ។
នាងខ្ញុំមកនៅយូរក្រែលដែរហើយនៅមិនទាន់ឃើញអីទេ ប៉ុន្តែចុងភៅគាត់ថាឧស្សាហ៍ឃើញញឹកញាប់ណាស់ ថាដូចជាឃើញមនុស្សដើរជុំវិញផ្ទះនៅពេលយប់ជ្រៅធ្វើឲ្យនាងខ្ញុំមានការសង្ស័យមករហូត ។ មានថ្ងៃមួយមិត្តភ័ក្តិរបស់នាងខ្ញុំបានឈៀងមកលេងនាងខ្ញុំ ដោយបបួលនាងខ្ញុំទៅដើរលេង ទៅរកញ៉ាំអីនៅខាងក្រៅ និងទំរាំត្រឡប់មកវិញ ឃើញថាយប់ជ្រៅគួរសម ។
នាងខ្ញុំបើកបន្ទប់មួយ ដែលនៅចាប់នឹងបន្ទប់ទឹកឲ្យមិត្តនាងខ្ញុំសម្រាក គិតថាឲ្យងាយស្រួលចេញចូលបន្ទប់ទឹក ។ យើងនាំគ្នាចូលគេង នៅវេលាប្រហែលម៉ោង ១១ យប់ ។ តាមធម្មតានាងខ្ញុំមិនដែលមានរឿងអ្វីកើតឡើងទេ ប៉ុន្តែហេតុការណ៍ដែលនឹកគិតមិនដល់នោះ ត្រឡប់ជាកើតឡើងជាមួយមិត្តរបស់នាងខ្ញុំទៅវិញ ។
មិត្តនាងខ្ញុំនិយាយឲ្យស្ដាប់ថា ពេលនាងចូលបន្ទប់ត្រៀមខ្លួននឹងដេកនោះ នាងមានអារម្មណ៍ថា ដូចជាមានមនុស្សមកសម្លឹងនាងគ្រប់ពេលវេលា ។ ក្រោយមកពេលនាងទម្លាក់ខ្លួនគេង នាងក៏ឃើញបុរសម្នាក់ដើរទម្លុះទ្វារចូកមកទាំងទ្វារនៅបិទយ៉ាងជិតឈឹង នាងភ័យណាស់ ប្រញាប់ស្រែកហៅនាងខ្ញុំ ប៉ុន្តែនាងស្រែកមិនរួច ។ សូម្បីតែកម្រើកខ្លួនក្រោកឡើង ក៏ឡើងមិនរួចផង ។
បុរសម្នាក់នោះ បានដើរមកនាងនៅគ្រែគេង ។ នៅខណ:នោះ នាងកំពុងតែដេកផ្ងារ ។ បុរសម្នាក់នោះ មកអង្គុយក្បែរ នាង រួចហើយលូកដៃមកចាប់ក្បាលពោះរបស់នាង ។ នាងព្យាយាមកម្រើកខ្លួនគេចចេញ ប៉ុន្តែធ្វើមិនបាន ។
នាងបានតែទន្ទេញនមោនៅក្នុងចិត្ត តែអាខ្មោចនោះ នៅតែសើចហ៊ឺសៗនៅក្នុងដើមក ។ បន្ទាប់មក វាបានលូកដៃចូលទៅក្នុងអាវរបស់នាងព្រមទាំងខ្ញាំក្បាលពោះរបស់នាងយ៉ាងសប្បាយ ។ មិត្តរបស់នាងខ្ញុំបានត្រឹមតែយំខ្លាចក៏ខ្លាច ភ័យក៏ភ័យ ។
នៅខណ:ពេលដែលអាខ្មោចឆ្គួតនឹងតណ្ហា កំពុងតែភ្លើតភ្លើននៅលើក្បាលពោះរបស់នាង នោះនាងបានសម្លឹងមើលទៅខ្លួនរបស់វាឃើញធំធ្មឹង សម្បុរខ្មៅព្រីក ព្រមទាំងស្លៀកក្បិនកញ្ចាស់តែមួយគត់ អាវក៏អត់មានពាក់ ។ នាងគិតក្នុងចិត្តថា មិនដឹងធ្វើយ៉ាងម៉េចល្អទេ ។ វាបានអង្អែលដើមទ្រូងរបស់នាងឡើងពេញចិត្តទៅហើយ ។
មិនត្រឹមតែប៉ុណ្ណោះ វាបានរំកិលដៃរបស់វាចុះមកល្វែងក្រោមរបស់នាងទៀត ។ នាងសម្រេចចិត្តលើកដៃច្រានទ្រូងរបស់វាយ៉ាងខ្លាំង ។ ទទេចែស ! គ្មានប្រយោជន៍ឡើយ ព្រោះវាដូចជានាងរុញខ្យល់ នាងមិនអាចប៉ះត្រូវរាងកាយរបស់វាឡើយ ។ ពេលនោះវាបានទម្លាក់ខ្លួនទ្រោបពីលើរាងកាយរបស់នាង ។ នាងណែនស្ទើដកដង្ហើមមិនចង់រួច ។ ចៃដន្យនាងបានឮសម្លេងមនុស្សចូលបន្ទប់ទឹក នាងយកជើងធាក់ជញ្ជាំងខ្លាំងៗពេញទំហឹង ។
ពេលនោះម៉ោងប្រហែល ១២ អាធ្រាត ។ នាងខ្ញុំមានអារម្មណ៍ឈឺពោះ ក៏ចូលទៅក្នុងបន្ទប់ទឹក នាងបានឮសម្លេងនាងធាក់ទ្វារលាន់គ្រាំងៗ នាងខ្ញុំបារម្ភក្រែងនាងមានរឿងអ្វី ក៏គោះទ្វារបន្ទប់នាងហៅនាងតិចៗ ។ ពេលបានឮសម្លេងគោះទ្វារ អាខ្មោចនោះ វាក៏បាត់ខ្លួនទៅ ។ ពេលនាងបានរួចខ្លួនហើយ នាងក៏ស្ទុះមកបើកទ្វារយ៉ាងប្រញាប់ ។ នាងខ្លាចរញីរញ័រនិយាយដាច់ៗ ប្រាប់រឿងរ៉ាវនេះដល់នាងខ្ញុំ ។ នាងប្រាប់នាងខ្ញុំថា តាំងពីកើតមក មិនដែលបានជួបហេតុការណ៍ឆ្កួតៗបែបនេះទេ មិនដឹងជាខ្មោចអំបល់វាយក៏អី ងាប់ទៅហើយនៅតែចង់រួមភេទទៀត ។ ឲ្យតែមានខ្មោចម៉ាកហ្នឹងបួនដប់ក្បាល ច្បាស់ជាក្រមុំៗពោះធំ អត់ប្ដីគ្រប់ៗគ្នាជាមិនខាន ៕
0 comments:
Post a Comment