រឿង វិញ្ញាណ ស្នេហ
កាលពីព្រេងនាយ កូនអ្នកទីក្រុង ឪពុកម្ដាយជាអ្នកលក់ដូរ ។ ពេលរៀនបានចេះដឹងល្មមៗ ក៏ឈប់ រួចងាកមកជួយម៉ែលក់ដូររហូតមក ។ ពេលនោះ នាងបានស្គាល់
លោកចម ជាស្វាមីដែលស្លាប់ទៅ។
នាងបានស្គាល់គ្នាជាច្រើនឆ្នាំមកហើយតាំងពីនៅរៀនម៉្លេះ ។
លោកចម ជាអ្នកបើករថយន្តដឹកទំនិញឲ្យក្រុមហ៊ុនមួយ ។ ទំនិញនាងលក់មួយចំនួន ក៏ទទួលមកពីក្រុមហ៊ុនរបស់លោក ចម ធ្វើការនោះដែរ ។
លោកចម តែងតែដឹកយកមកបោះឲ្យនាងដល់ៗហាង ។ គាត់ជាបុរសតែម្នាក់គត់ចូលចិត្តមកជជែកលេងជាមួយនឹងនាង កាលណោះ លោកចមមិនទាន់ជាស្វាមីនាងទេ។
អស់រយ:ពេលប្រហែលជាមួយឆ្នាំឯណោះ ទើបនាងបានទទួលសំបុត្រសុំស្នេហ៍ពីលោកចម ។ នាងមិនហ៊ានតបទៅវិញទេ ខ្លាចពុកដឹងច្បាស់ជាវ៉ៃខ្លោចខ្នងមិនខាន រឿងមានស្នេហា លួចលាក់កំបាំងមុខម៉ែឪនេះ ។
គាត់ចង់ឲ្យកូនស្រីរបស់គាត់ បានរៀបការជាមួយអ្នកមានឋាន:គ្រាន់បើបន្តិច ។ កូនប្រសារមានស្ថានភាពទន់ខ្សោយជាងគាត់ គាត់នឹងមិនឲ្យទេ ។
នាងគិតថា លោកចម ប្រហែលជាគ្មានវាសនាបាននាងធ្វើជាភរិយាទេ ព្រោះគាត់មានឋាន:តូចទាប (ក្រ) ជាងគ្រួសាររបស់នាង។
ប៉ុន្តែគាត់ឧស្សាហ៍រកពេលមកជួបនាងជាញឹកញាប់ណាស់ ។ នាងក៏ស្រឡាញ់ អាណិតគាត់ណាស់ដែរ និងមិនដឹងជាធ្វើយ៉ាងម៉េចបើខ្លួនជាស្រី ។
លោក ចម ប្រាប់នាងជាញឹកញាប់ថា ទោះជាឪពុកម្ដាយនាងបង្គាប់ប៉ុន្មាន ក៏គាត់រកឲ្យទាល់តែបាន ឲ្យតែលោកទាំងពីរបង្គាប់ក្នុងភាពត្រឹមត្រូវ។
ប៉ុន្តែ កាន់តែសេពគប់គ្នាជិតស្និទ្ធខ្លាំងទៅ ក្ដីសង្ឃឹមនៃថ្ងៃរៀបការរបស់អ្នកទាំងពីរ ក៏កាន់តែឃ្លាតឆ្ងាយទៅ ។ ព្រោះនាងបានទទួលដំណឹងរសឹប ព្រមទាំងបានឃើញផ្ទាល់នឹងភ្នែកពួកកំលោះៗជាច្រើននាក់ដែលមានមុខតំណែងខ្ពស់
គួរសម គេមកមើលនាង ដោយមានការអនុញ្ញាតពីសំណាក់ឪពុកម្ដាយរបស់នាង ។
ដល់ដំណាក់កាលនេះ ទើបនាងមានអារម្មណ៍ថា នាងកាន់តែអាណិតស្រឡាញ់ លោក ចម កាន់តែខ្លាំងឡើង ។ ប្រសិនបើបើកដៃឲ្យគាត់ចូលមកប្រកួតប្រជែងប្រាកដជាគាត់មិនឈ្នះគេឡើយ ។
ម៉្យាងវិញទៀត នាងគ្មានចិត្តស្រឡាញ់ពួកកំលោះៗ ដែលពុកនាងបើកដៃឲ្យមកមើលនាងនោះសោះ មើលទៅគ្មានត្រូវចិត្តនាងឡើយ ។
នៅទីបំផុត ដោយមិនអាចទ្រាំបាន លោក បានមកបបួលនាងរត់ ដោយប្រាប់ថានឹងយកនាងខ្ញុំទៅនៅខាងផ្ទះបងប្អូនរបស់គាត់ ។ គាត់ថាប្រសិនបើមិនដូច្នេះទេ នាងប្រាកដជាធ្លាក់ទៅលើដៃប្រុសផ្សេងជាមិនខាន ។
គាត់អង្វរលន់តួថា ប្រសិនបើនាងអាណិតស្រឡាញ់គាត់ពិតមែន សុំឲ្យនាងរត់ទៅតាមគាត់ គាត់នឹងចិញ្ចឹមបីបាច់ថែរក្សានាងឲ្យល្អបំផុត រួចហើយចាំត្រឡប់មកសុំខមាទោសឪពុកម្ដាយរបស់នាងវិញ ។
ដោយសេចក្ដីស្នេហានិងយល់ថាអាចទុកចិត្តបានទើបនាងសំរេចចិត្តរត់ទៅអាស្រ័យនៅជាមួយនឹងញាតិមិត្តបងប្អូនរបស់គាត់ ។
មិនបានប៉ុន្មាន បងរបស់ លោកចម បានចែកផ្ទះតូចមួយឲ្យគូស្នេហ ទាំងពីរស្នាក់នៅជាមួយគ្នា។ រស់នៅជាមួយគ្នា មានសេចក្ដីសុខណាស់ ។
គាត់ថ្នាក់ថ្នមនាងដូចពាក្យសន្យាមែន ។ ពេលរៀបចេញទៅធ្វើការម្ដងៗ គាត់ហាមនាងមិនឲ្យចេញទៅក្រៅ ឆ្ងាយឡើយខ្លាចមានគេឃើញនឹងយកទៅប្រាប់ឪពុកម្ដាយនាង ។
ប៉ុន្តែគួរឲ្យអនិច្ចា គូស្នេហ នៅរួមសុខជាមួយគ្នាមិនទាន់បានមួយឆ្នាំផង ក៏កើតមានឧប្បតិហេតុក្រឡាប់រថយន្ត ធ្វើឲ្យលោកចម របស់នាងត្រូវចាកចេញទៅ ដោយគ្មានថ្ងៃនឹងវិលត្រលប់មកវិញទាំងពេលនេះនាងកំពុងតែចាប់ផ្ដើមធ្វើជាម្ដាយរបស់គេទៅហើយ ។
លោកចម បើករថយន្តបុកគ្នាជាមួយនឹងរថយន្តកង់ ១០ និងត្រូវស្លាប់ក្រោយពេលយកទៅដល់មន្ទីរពេទ្យមិនបានប៉ុន្មានផង ។
វាពិតជាគួរឲ្យសោកស្ដាយហួសពេក តាមពិតទៅថ្ងៃនោះ ត្រូវវេនគាត់សំរាកទៅហើយ ប៉ុន្តែចៃដន្យ អ្នកបើកបរវេននោះផឹកស្រាស្រវឹងបើករថយន្តលែងកើត ទើបអ្នកគ្រប់គ្រងឲ្យបុគ្គលិកតាមមកហៅគាត់ ដល់ផ្ទះ ឲ្យទៅបើករថយន្តជំនួស ។
ពេលនោះយើងកំពុងតែរៀបចំខ្លួនចូលគេងទៅហើយ។ ពេលដឹងថានឹងត្រូវធ្វើការទៀត គាត់ក៏សុខចិត្តទៅទាំងគ្រវីក្បាល ។ មុនគាត់ចេញទៅ បានផ្ដាំនាងថា : «បងទៅហើយណា មើលបិទទ្វារបិទបង្អួចផង» ផ្ដាំរួច
គាត់ទាញអាវយឺតពាក់បណ្ដើរ ដើរចេញទៅបណ្ដើរគួរឲ្យអាណិត ។ នាងបិទទ្វារបិទបង្អួចចូលគេងទាំងលក់ភ្ញាក់ៗ ព្រោះនឹកបារម្ភដល់ប្ដី ។
មកភ្ញាក់ដឹងខ្លួនម្ដងទៀត ស្រាប់ឃើញគាត់ មកដេកក្បែរនាងខ្ញុំ មិនដឹងតាំងពីថ្មើណា ។ នាងគិតថា ប្រាកដជាអស់កំឡាំង និងងុយគេងខ្លាំងណាស់ ទើបនាងមិនហ៊ានដាស់សួរ ។
នាងក៏សំងំគេងម្ដងទៀតទៅ ។ ពេលភ្ញាក់ដឹងខ្លួនមកម្ដងទៀត ក៏កើតមានអ្វីខុសប្លែកពីធម្មតា ព្រោះនៅពេលនាងបោះដៃរាវរកប្ដី ស្រាប់តែមិនមានប៉ះទាល់តែសោះ ។
ម៉ោងប្រហែលជា ៣ ឬ ៤ ទៀបភ្លឺប៉ុណ្ណោះ ប្ដីនាងមិនដែលក្រោកទៅណាទេ ។ នាងប្រញាប់ងើបឡើង តាមរកក៏មិនឃើញ ។
ចំណែកទ្វារនៅខ្ទាស់ពីខាងក្នុងដដែល បញ្ជាក់ថា គាត់មិនអាចចេញទៅក្រៅបានទេ ។ នាងឆ្ងល់ណាស់ ហេតុអីក៏រកមិនឃើញ ? នាងស្រែកហៅ ក៏មិនឮឆ្លើយទៀត ។
ពេលនេះ នាងលែងហ៊ាននៅផ្ទះម្នាក់ឯង ព្រោះមានអារម្មណ៍ថា ស្វាមីប្រហែលជាមិនស្រួលហើយ ។ នាងបើកទ្វាររត់សំដៅទៅផ្ទះមីងមារបស់ លោកចម ដើម្បីសាកសួរមើល តើឃើញគាត់ដែរឬអត់ ។
ពេលទៅដល់ឃើញញាតិមិត្តរបស់ គាត់ ជាច្រើននាក់ កំពុងមានអាការតក់ស្លុត ។ សម្លេងនរណាម្នាក់បានសួរមកនាងថា :
បានដឹងរឿងអា ចម ហើយឬបានជារត់មកទាំងស្លន់ស្លោរដូច្នេះ ? នាងសួរបកទៅពួកគេវិញថា :
ដឹងរឿងអី មានឃើញគាត់ទេ ទេ ? យប់មិញត្រឡប់មកពីបើកឡានវិញ បានដេកក្បែរខ្ញុំទៀតផង ប៉ុន្តែពេលនេះមិនដឹងជាបាត់ទៅណា ! ពួកគេតបមកនាងខ្ញុំវិញថា :
យល់សប្តិទេដឹង អាចមត្រូវរថយន្តបុកស្លាប់បាត់ទៅហើយត្រឡប់មកវិញធ្វើម្ដេចនឹងកើត ? ពេលបានឮដូច្នេះ នាងស្រាលខ្លួនស្លេវស្លឹកត្រចៀកហ៊ឺងងងឹតៗ ទប់ខ្លួនលែងចង់នឹង ។ ពួកគេបន្ថែមទៀតថា :
ខាងក្រុមហ៊ុន គេមកប្រាប់អំបាញ់មិញនេះ ថាអា ចម បើកឡានបុកគ្នាស្លាប់បាត់ទៅហើយ ។ ពេលនេះសាកសពវា នៅមន្ទីពេទ្យឯណោះ ។ ពួកយើងរៀបទៅប្រាប់ ! ចៃដន្យឯងមកដល់ល្មម !
នាងស្ដាប់ឮតែប៉ុណ្ណោះ ក៏សន្លប់បាត់ស្មារតីទៅ ។ ពេលភ្ញាក់ដឹងខ្លួនមកវិញ ភ្លឺចែសទៅហើយ ។ នាងនឹកដល់ហេតុការណ៍ ដែលនាងបានឃើញកាលពីយប់មិញនោះ គឺជាវិញ្ញាណស្វាមីរបស់នាងពិតប្រាកដ ។
មុននឹងស្លាប់ គាត់ប្រាកដជាបារម្ភនឹងនាងខ្ញុំណាស់ទើបពេលដាច់ខ្យល់ទៅ វិញ្ញាណរបស់គាត់មករកនាងភ្លាម ។ រឿង លោកចម ដែលលូនចូលដេកជាមួយនឹងនាងនោះ ប្រាកដជាមិនអាចទៅកើតទេ ព្រោះទ្វារសុទ្ធតែខ្ទាស់ពីខាងក្នុងទាំងអស់ ។
គ្មានអ្វីសង្ស័យឡើយព្រោះមានតែខ្មោចឬវិញ្ញាណទេ ទើបអាចចូលមកបាន… ទោះបីជាដឹងថា ជីវិតមនុស្សយើងមិនទៀងក៏ដោយ នាងនៅតែសោកសៅស្ដាយស្រណោះប្ដីណាស់ ព្រោះកាត់ជាមនុស្សល្អ និងជាអ្នកផ្ដល់កំណើតឲ្យកូននៅក្នុងផ្ទៃរបស់នាងផង ។ នា
ងអាណិតកូនខ្លាំងណាស់…ពេលវាកើតមកគ្មានឪពុកនឹងគេ ។ នាងសុំអនុញ្ញាត មិននិយាយពីការធ្វើបុណ្យសពប្ដីអីនោះទេ ។
គ្រាន់តែបញ្ជាក់ថា ក្រោយពីបុណ្យឲ្យស្វាមីហើយ ក៏លេចឮដំណឹងដល់ឪពុកម្ដាយរបស់នាងពួកគាត់ក៏តាមមកទទួលនាងខ្ញុំឲ្យទៅនៅជាមួយវិញ ។ តមក នាងប្រសូត្របានកូនប្រុស និងនៅជាមេម៉ាយកូនមួយរហូតមកដល់សព្វថ្ងៃនេះ ៕ចប់ដោយបរិបូរណ៌
0 comments:
Post a Comment